Detective John Kimble– 《幼稚園特警》(1990)
阿諾嘗試轉型演喜劇嘅第二擊(第一擊係《龍兄鼠弟》,其實都唔錯),本作票房同口碑都係相當成功。嗰啲湊細路拿手唔成世同埋用大人方法管理細路嘅笑料十分唔錯,甚至令呢個題材成為一種類型片種,其後嘅大隻佬例如雲迪素、The Rock等等個個都要整返齣咁上下嘅湊仔戲嚟顯示佢哋係有表情識演戲。
T800 –《未來戰士續集》: Judgement Day (1991)
阿諾第二次再演T800角色已經由壞人轉變成英雄,由未來被派遣到現代保護少年 John connor,並且發展咗少少父子牽絆。電影嘅特技同製作喺當年嚟講係最高水平,就算今日標準嚟評價都唔失禮。
Jack Slater - 《幻影英雄》(1993)
票房同成本唔成正比,但係其實戲唔錯,係阿諾最被低估嘅作品。阿諾喺戲中扮演銀幕上嘅角色,因為一張魔幻戲票而嚟到現實世界。有兩場戲超級好笑印象深刻:(1)幻影阿諾遇上現實阿諾,投訴話因為佢演戲令戲中人生活痛苦;(2)戲中世界《未來戰士續集》嘅主角係史泰龍,阿諾大讚“He's fantastic. It's his best performance ever!”