免費論壇 繁體 | 簡體
Sclub交友聊天~加入聊天室當版主
分享
返回列表 發帖

新消息:何嘉麗重返DJ界

有話兒:何嘉麗拒絕廢噏

退出廣播界20年的小神仙何嘉麗再次落入凡間,於後日在港台出山開咪。


小神仙終於再次落入凡間了。曾主持港台《三個小神仙》的80年代當紅DJ何嘉麗,下周一將重返大氣電波為港台主持新節目《Call Me GaGa》。雖然嘉嘉封咪多年,但20年公關經驗將其口齒磨練得更伶俐。提到當年她毅然離開DJ界,她笑言是因為聽到某DJ主持節目時的一輪廢噏,令她害怕有一日會步其後塵,所以立即遞信辭職。撰文:戴彩煥
體育界有位何嘉麗,演藝界也有兩位何嘉麗,一個是在《義不容情》中飾演黃日華妹妹的無綫藝員;另一位,是跟鄭丹瑞和林珊珊主持《三個小神仙》的何嘉麗。
82年加盟港台的嘉嘉,當年DJ事業發展一帆風順,又做歌手又做電視主持,歌視播三棲。只是,嘉嘉92年當打之際,突然向港台辭職轉投公關行業,出乎全人類意料之外。



擘大口冇嘢講
「當年離開同港台冇唔開心,只係做節目時開始發覺自己擘大口唔知講乜,同理聽嚟聽去又係嗰啲歌,某日聽完某DJ喺節目廢噏之後,加速我離開嘅決心,佢話:『其實呢你知道啦,呢個世界嘅嘢冇嘅……』完全冇內容,我心諗死啦!如果有一日我變成咁,真係接受唔到,所以我決定就算唔係唔做都要停一停!」
嘉嘉偶然獲悉中電請公關,於是寫求職信,開始了公關生涯:「初時有啲唔習慣,有同事會走埋嚟搵你影相,但漸漸發覺喺工作上反而仲方便,同事間溝通容易咗。」嘉嘉先後在中電、證監會和九巴任職。



嘉嘉當年雖與歌手合作無間,但工作以外鮮與歌手打交道。在86年英女皇訪港大滙演中,三個小神仙與麥潤壽獲欽點御前演出。左起:賈思樂、余綺霞及何嘉麗當年合照,但如今霞女已逝世多年,此情難再。

最愛我行我素
當了20年公關的嘉嘉,本計劃月前辭去九巴企業傳訊部經理後退休享受人生,結果經不起港台三寸不爛之舌,重返娘家重操故業。
嘉嘉表示:「我今年51歲,因為5字,我就諗應該做的乜呢?我喺九巴其實可以一路做到65歲,除非犯刑事,但係咪咁一路做落去?我真係諗住退休,同埋想喺宗教方面再做多少少嘢。麥潤壽走咗之後,港台有搵我,但我未ready。今次再傾覺得自己幾ready。雖然相隔20年,電台科技亦進步咗好多,但我OK適應到,初時好驚唔熟,但學咗幾次之後,家個panel同我好似鐵甲奇俠咁,一坐埋去已經合而為一。」
嘉嘉不論做歌手或做DJ也是我行我素,工作以外不喜歡與歌手或唱片公司打交道,頂多出席唱片公司每年安排的大堆頭飯局:「我做完節目就走,好少同電台啲人一齊玩。有一排我成日播郭富城啲歌,但我同佢完全冇私交,同唱片公司又唔friend,同佢哋出去食飯我又唔舒服。」



讚林珊珊可愛
唔出聲的嘉嘉,予人又cool又寸的感覺,但她本人卻毫不察覺:「試過有人同我講早晨,我跟住問佢:『做乜咁好同我講早晨呀?』諗番上嚟,點解自己嗰時咁衰嘅?」那些年,外界總喜歡將她與同期出道的珊珊作比較,二人之間有沒有明爭暗鬥?嘉嘉說:「我係戇居居嘅人,唔係好sense到呢啲嘢,珊珊好識做人,個人可愛啲,樣又可愛啲,唔似我,一唔高興就黑面。」有否考慮三個小神仙重組?嘉嘉說:「可能3個月後我會俾人炒,衰咗點算?逐步嚟啦!」



染髮比喻婚姻
當年DJ兼任歌手出唱片風氣十分盛行,嘉嘉曾推出唱片,首張大碟更撮合了她與導演區丁平(毛舜筠現任丈夫)的一段情,嘉嘉說:「佢係我朋友嘅朋友,我出唱片同朋友呻唔鍾意唱片公司啲嘢,太肉酸,好行貨,封套一個大頭就算。佢(區丁平)幫我做免費美術指導,當時佢同張叔平已經好紅,咁跟住總有分手嘅時候,之後我梗係有拖拍啦,唔好以為我冇人吼!」



80年代何嘉麗與鄭丹瑞和林珊珊主持的《三個小神仙》深受年輕人歡迎。曾推出多張唱片的何嘉麗,以《無可奉告》最為人熟悉。

不強求結婚
到今日嘉嘉仍是單身,究竟有沒有想過結婚生仔?嘉嘉表示:「你睇我啲白頭髮就知,到家都堅持唔染,染頭髮一染開就要染,我咪好唔得閒?結婚睇落係好圓滿,但背後可能千瘡百孔,要好努力維持,所以有啲嘢我會做,但有啲嘢唔係時候我唔會夾硬嚟。」

返回列表