免費論壇 繁體 | 簡體
Sclub交友聊天~加入聊天室當版主
分享
Board logo

標題: 蜘蛛俠誕生五十週年紀念 [打印本頁]

作者: shaiya    時間: 2012-8-13 23:26     標題: 蜘蛛俠誕生五十週年紀念

Stan Lee創作嘅超級英雄蜘蛛俠最早喺1962年8月10日嗰期 Marvel comic出現,至今啱啱五十年。
當期已經有晒少年 Peter Parker俾一隻輻射蜘蛛咬,然後獲得超級能力維護正義等等,成個故仔個架構已經有晒。
亦係由呢一日開始,蜘蛛俠遊走喺各種媒體間,成為最廣為人知嘅超級英雄之一



蜘蛛俠初現 (1962)
1962年,Marvel漫畫主筆 Stan Lee正構思一個可以好似神奇四俠咁受歡迎嘅超級英雄,同時要夠年輕以獲得年青讀者嘅認同。喺畫家 Steve Ditko幫手下,構思出少年 Peter Parker俾一隻輻射蜘蛛咬,然後獲得發射蜘蛛網超級能力呢個人物。Marvel出版人同意俾蜘蛛俠喺旗下漫畫書 Amazing Fantasy(圖)亮相以測試讀者反應。結果該期書非常賣得,蜘蛛俠翌年得以獨立成書,就係大家都知嘅 The Amazing Spider-Man。
Stan表示一直想將 Peter Parker嘅故事講得有血有肉,同每個人一樣有煩惱,以獲得大家共鳴。



早年漫畫書
六十年代中期,The Amazing Spider-Man成為 Marvel銷量王牌,蜘蛛俠亦成為文化現象。喺1965年 Esquire做咗個調查,當時學生將蜘蛛俠、哲古華拉同 Bob Dylan一齊視為革命嘅象徵。



首次動畫化(1967-1970)
1967年,喺畫師 Ralph Bakshi(圖)主理下,蜘蛛俠首次拍成電視動畫,主題曲'Spider-Man, Spider-Man, does whatever a spider can'立即成為蜘蛛俠嘅代表至今不衰,動畫持續播出至1970年。



真人演出電視劇(1977)
1977年美國 CBS電視台開拍真人版蜘蛛俠電視劇, Nicholas Hammond(圖)飾演 Peter Parker,當時嚟講收視十分唔錯。可惜 CBS決定喺1978年將本系列完結,原因頗為無聊:由於當時佢哋已經決定要開神奇女俠同變型俠醫,唔想觀眾將佢哋定型做「漫畫英雄台」因此要 cut咁啲。



蜘蛛俠動畫(80至90年代)
儘管上世紀八、九十年代曾經多次傳出開拍動畫電影,但係呢個時期蜘蛛俠始終只活躍於電視動畫。NBC喺1981年曾經播出,Fox network喺94同99年又播過,2000年打後亦有啲零碎嘅蜘蛛俠動畫耐唔耐喺唔同電視台又播下。



蜘蛛俠初登大銀幕(2002)
蜘蛛俠電影其實都好多波折,八十年代 Cannon Films曾經籌拍唔成功,九十年代占士金馬倫諗過又無成事。終於2002年由(聲稱)漫畫書粉絲 Sam Raimi執導拍成首集電影,杜比麥奎亞飾 Peter Parker,姬絲頓丹絲飾 Mary Jane Watson,本片對手壞人係威廉達科飾演嘅綠魔(Green Goblin)。



蜘蛛俠2(2004)
2004年第二集拍成,電影入面嘅時間同樣係兩年之後,蜘蛛俠一方面感到平凡人同超級英雄兩種生活好矛盾,另一方面要阻止 Alfred Molina飾演嘅八爪魚博士(Dr. Octopus)毀滅紐約。



蜘蛛俠3(2007)
Sam Raimi執導三部曲系列嘅最後一集,同時杜比麥奎亞同姬絲頓丹絲亦宣佈喺呢集之後唔再參演蜘蛛俠電影。呢集雖然有知名嘅壞人毒液 (Venom)登場,但係影評毀譽參半,普遍認為係三集之中劇力最弱。



蜘蛛俠音樂劇@百老匯(2010)
蜘蛛俠故事改編而成嘅音樂劇返到故事舞台紐約百老匯,劇名為 Spider-Man: Turn Off the Dark,成本破紀錄達到六千三百萬美元,片中音樂由 Bono同 The Edge負責。同樣地音樂劇個頭開得唔好,例如主角同特技人分別發生意外,由二十尺同三十尺高處墮下。本劇破百老匯紀錄試演182場,為歷來紀錄,一直惹來劇評人劣評,幸好效果不斷改進最終票房收益尚算可以。



漫畫引入新蜘蛛俠(2011)
2011年,Marvel有感漫畫書故事攪嚟攪去都係咁上下悶悶地於是劇情突破整個新蜘蛛俠,有見於奧巴馬入主白宮大受歡迎,作者 Brian Michael Bendis同畫師 Sara Pichelli兵行險著整咗個美籍非裔黑人少年 Miles Morales分享蜘蛛俠嘅能力。有啲人唔滿意認為呢個係政治正確或者拍馬屁嘅舉動,但係多數讀者鍾意。



蜘蛛俠驚世現新(2012)
第四齣蜘蛛俠電影,無咗之前三集嘅Sam Raimi、杜比麥奎亞同姬絲頓丹絲,男女主角分別換上安德魯嘉菲同愛瑪史東,戲裡戲外都係情侶關係。本集導演 Marc Webb決心將整個故事 reboot由零開始再講過,續集已在籌備中。
同時,喺五十週年嘅今年,全新動畫系列 Ultimate Spider-Man亦開始喺 Disney XD啟播。





歡迎光臨 幻影時光地帶 (http://heartwish.mylike.me/) Powered by Discuz! 7.2