http://hk.apple.nextmedia.com/realtime/entertainment/20130424/51368513
微博和facebook,係一個好好嘅平台,可以尋找失物,亦可以尋找失去咗嘅記憶……甚至至親。
楊秀惠噚日喺微博貼圖,話妹妹架車被搶,於是發微博促網民助尋賊仔。其實噚日傍點六點半左右,歌手胡渭康亦於微博貼咗一張數十年前嘅全家福,並寫道﹕
「致親生父母的信:照片中兩位,便是當年你們把我送養的人,請放心,他們待我很好。當年把我丟下不理,相信總有你們的理由,請放心,我心中沒有怨恨過。
「今天他們都九十有多了,你們若有機會看到這訊息,希望你們會遙遠送上感謝及祝福就夠了。請放心,他們過得很好。你們過得好嗎? 2013423。」
47歲的胡渭康,在尋親,也不是尋親。但口裡說不想見親生父母,心裡想著的,又是如何?
關於胡渭康與雙親的故事,佢曾於訪問中提過。當年…所謂當年已經係1984年,胡渭康以小虎隊名義出道,一曲《忍著淚說Goodbye》街知巷聞。那時他只有19歲。
30歲那年,胡渭康突然決定退出娛樂圈,去咗英國,一去就6、7年。因為當年,佢啱啱知道自己係孤兒。共處卅載嘅爸爸媽媽,原來唔係佢爸爸媽媽。親生父母,另有其人。當時胡渭康曾講過﹕「其實一早就估到少少,到父母講,終於證實咗。媽咪曾經想講畀我聽,到底我真正父母是誰。但我拒絕聽,我唔想知。就算知道咗邊個,咁又點?我去搵佢?咁又有乜嘢好講?」
生娘不及養娘大,胡渭康同養父母嘅感情,非常深厚。當日決定由英國返港,唔係為復出娛樂圈,而係照顧年邁雙親。父母年紀大,又患上老人癡呆症,胡渭康放心不下,決定返港。兩老現居老人護理中心,胡渭康曾笑謂,父母已經90歲有多了,反而都變成了小孩子,返老還童那樣。
但願胡渭康的心結能放下。至於能否一家團聚,就要看緣份和造化了。